O pasado 14 de setembro de 2024, Os Biosbardos cumpriu cinco anos e celebrámolo como máis nos gusta: cos pés na terra e o corazón na comunidade. Así naceu o I Leira Fest: Arte nas Leiras, unha xornada inesquecible onde a arte, a agroecoloxía e a celebración se uniron para sementar algo máis ca ledicia: sementamos futuro.
Mais o que moita xente aínda non sabe é que o Leira Fest tamén foi un evento solidario. Grazas á implicación de todas as persoas asistentes, voluntarias, artistas e colaboradoras, puidemos converter esa enerxía colectiva nunha acción ben concreta: doar máis de 500 kg de alimentos ecolóxicos a máis de 40 familias en situación de vulnerabilidade. Fixémolo a través da Fundación ADRA, coa que compartimos a certeza de que a terra ben cultivada pode alimentar moito máis ca estómagos.
Porque si, un festival pode ter concertos, obradoiros, faladoiros, arte en vivo, actividades para a cativada e momentos de festa…
Pero tamén pode mobilizar terras, xerar emprego, formar persoas, activar circuítos agroecolóxicos e, sobre todo, axudar a quen máis o precisa.
Con este primeiro Leira Fest puxemos en marcha unha idea poderosa: que a cultura rural, feita con amor e con propósito, pode ser unha ferramenta de transformación real. E funcionou tan ben, emocionounos tanto, que xa estamos a traballar na segunda edición do Leira Fest en 2025.
Volverán a música, a arte, os obradoiros e a alegría compartida… pero sobre todo, volverá a posibilidade de construír un rural máis xusto, máis vivo e máis humano.
Porque entre leiras, si, florece a arte.
Pero tamén pode florecer a solidariedade. E iso é, quizais, o máis fermoso que podemos sementar.
