No LeiraFest 2025 tivemos o privilexio de contar coa participación de Víctor Boga, unha das voces máis recoñecidas en Galicia no ámbito da agroecoloxía e da rexeneración de solos.
Quen é Víctor Boga?
Economista de formación, no 2008 decidiu dar un xiro radical á súa vida: deixou o seu posto como director financeiro para dedicarse de cheo ao rural. Desde entón lidera o proxecto Millo e Landras – MEL Finca Orgánica S. Coop. Galega, unha cooperativa sen ánimo de lucro que sitúa a saúde do solo como base da saúde das persoas e do medio ambiente.
Foi pioneiro en Galicia na implantación do modelo de agrocompostaxe, xestionando de forma local a materia orgánica para transformala en fertilidade. O seu traballo recibiu recoñecementos estatais pola loita contra o desperdicio alimentario e pola creación de puntos verdes comunitarios, en colaboración con concellos como o de Vilasantar.
A súa traxectoria está tamén vencellada á innovación e á investigación agroecolóxica: colabora con universidades galegas e participa en proxectos europeos como SOB4ES (Soil Biodiversity for Ecosystem Services).
Que é o proxecto SOB4ES?
Na súa mesa redonda no LeiraFest, Víctor presentounos en detalle este proxecto europeo que busca integrar a biodiversidade do solo nas políticas de manexo da terra cara ao 2050.
O solo baixo os nosos pés é un ecosistema vivo, cheo de bacterias, fungos, insectos e miñocas que:
- Aportan nutrientes de forma natural grazas á reciclaxe da materia orgánica.
- Almacenan carbono orgánico, axudando a frear o cambio climático.
- Refórzan os cultivos fronte a pragas e enfermidades mediante organismos beneficiosos.
- Melloran a infiltración de auga e a fortaleza do solo, grazas a insectos e miñocas que actúan como verdadeiros “enxeñeiros do ecosistema”.
SOB4ES investiga como medir de forma máis precisa a saúde dos solos, desenvolvendo indicadores fiables e rendibles que axuden a agricultores, responsables políticos e cidadanía a comprender o vital que é a vida do solo para o noso futuro.
Un espazo participativo
Ademais da explicación teórica e do debate con agricultoras e agricultores, Víctor convidou a todas as persoas asistentes a implicarse activamente na investigación a través dun cuestionario aberto ao público.
Podes participar aquí: Cuestionario SOB4ES
Coa túa achega estarás contribuíndo a un proxecto europeo que busca coidar o solo, rexenerar a biodiversidade e construír un rural vivo e con futuro.
